Holbergprisen sitt styre består av styreleiar og fire styremedlemmer, som blir utnemnt av universitetsstyret ved Universitetet i Bergen etter nominasjonar frå Det Norske Videnskaps-Akademi og norske universitet. Britt Andersen og Knut Olav Åmås blei konstituerte som nye styremedlemmer på universitetsstyremøtet den 28. april i år.
Britt Andersen er prodekan for forskning ved Det humanistiske fakultet ved NTNU og professor i allmenn litteraturvitenskap. Ho har blant anna arbeidd mykje med modernisme, feminisme, psykoanalyse og skeiv teori. Andersen er òg hovudredaktør for Norsk Litteraturvitenskaplig Tidsskrift.
Knut Olav Åmås er direktør i Stiftelsen Fritt Ord og har elles brei erfaringsbakgrunn frå kultur- og samfunnsliv, blant anna som sakprosaforfattar, tidlegare statssekretær i Kulturdepartementet og redaktør for kultur, debatt og forskning i Aftenposten.
Åmås og Andersen kjem inn i fotefara etter Petter Aaslestad og Kjellbjørg Lunde, som no takkar av. Styreleiar Sigmund Grønmo (UiB), Trude Haugli (UiT) og Øivind Andersen (DNVA) er held fram i sine verv.